• “Azərbaycanda turizm sənayesi” mövzusunda təqdimat Yaponiyanın iş adamları tərəfindən maraqla qarşılanmışdır

    Tarix: 2013-06-15

    “Azərbaycanda turizm sənayesi” mövzusunda təqdimat Yaponiyanın iş adamları tərəfindən maraqla qarşılanmışdır

    Tokioda Azərbaycan Respublikasının Yaponiyadakı səfirliyinin və Yaponiya Səyahət Agentliyi Assosiasiyasının birgə təşkilatçılığı ilə “Azərbaycanda turizm sənayesi” mövzusunda təqdimat keçirilmişdir. 

    Təqdimatda Yaponiyanın Torpaq, İnfrastruktur, Nəqliyyat və Turizm Nazirliyinin məsul işçiləri, 30-dək şirkətin nümayəndələri və mütəxəssislər iştirak etmişlər. 

    Azərbaycanın Yaponiyadakı səfiri Gürsel İsmayılzadə əvvəlcə ölkəmizin iqtisadiyyatı haqqında danışmış, aparıcı sahələr, makroiqtisadi göstəricilər və son illər müşahidə olunan dinamik inkişaf barədə iştirakçılara ətraflı məlumat vermişdir. Sürətli inkişaf yolu tutmuş Azərbaycanda ənənəvi enerji sektoru ilə yanaşı, qeyri-neft sektorunun inkişafına xüsusi diqqət yetirildiyi diqqətə çatdırılmışdır. Azərbaycana sərmayə qoyuluşu üçün əlverişli investisiya mühitinin mövcud olduğu, bu məqsədlə bütün zəruri qanunverici sənədlərin qəbul edildiyi bildirilmişdir. 

    Dünya Bankının və digər beynəlxalq maliyyə təşkilatlarının Azərbaycanda həyata keçirilən iqtisadi islahatları, ölkədəki mövcud biznes mühitini yüksək qiymətləndirdikləri vurğulanmışdır. 

    Azərbaycanlı diplomat ölkəmizin ərazisindən keçən Şərq-Qərb (İpək Yolu) və Şimal-Cənub beynəlxalq nəqliyyat dəhlizləri haqqında da danışmış, Bakı-Tbilisi-Qars dəmir yolu layihəsinə toxunaraq onun region üçün əhəmiyyətini izah etmişdir. 

    Nəqliyyat sahəsində iri layihələrin həyata keçirildiyini diqqətə çatdıran səfir dəmir yolu və magistral yolların bərpası və yenilərinin tikintisi, körpü və digər infrastruktur obyektlərinin inşası barədə də məlumat vermişdir. Heydər Əliyev Beynəlxalq Aeroportunda yeni aerovağzal kompleksinin tikintisinin sürətlə davam etdirildiyi qeyd edilmişdir. 

    Diplomat Azərbaycanın turizm sektoru haqqında məlumat verən diplomat, bu sahənin inkişafı üçün əməli tədbirlər görüldüyünü, zəruri infrastrukturun yaradıldığını və görülən işlər nəticəsində ölkəmizə turist axınının ildən-ilə artdığını söyləmişdir. Ölkədə beynəlxalq standartlara cavab verən turizm obyektlərinin tikildiyi bildirilmişdir. Doqquz iqlim qurşağına malik olan ölkəmizdə turizmin müxtəlif növlərinin inkişafı üçün əlverişli şəraitin mövcud olduğu, müasir standartlara cavab verən turizm obyektlərinin və infrastrukturun inşa edildiyi, bu istiqamətdə işin davam etdiyi qeyd edilmişdir. 2010-2014-cü illəri əhatə edən Azərbaycanda turizmin inkişafına dair Dövlət Proqramı haqqında ətraflı məlumat verilmişdir. 

    Ölkəmizə gələn turistlərin ümumi göstəricisi və Azərbaycana səfər edən yapon turistlərin artım dinamikası, otellərin sayı, turizm şirkətləri haqqında məlumatlar tədbirdə nümayiş etdirilən slaydlar vasitəsilə iştirakçıların diqqətinə çatdırılmışdır. 

    Səfir, həmçinin Ermənistan-Azərbaycan, Dağlıq Qarabağ münaqişəsi haqqında məlumat vermiş, ölkəmizin Ermənistan tərəfindən təcavüzə məruz qaldığını, ərazimizin 20 faizinin işğal olunduğunu, 1 milyonadək soydaşımızın doğma evlərindən didərgin düşdüyünü vurğulamışdır. 

    Ermənistanın işğalçı siyasəti nəticəsində Azərbaycanın iqtisadiyyatına, o cümlədən turizm sektoruna ciddi ziyan dəydiyi bildirilmişdir. Ermənistan tərəfindən blokadaya alınmış Naxçıvan Muxtar Respublikası ilə dəmir yolu əlaqəsinin kəsildiyi də qeyd edilmişdir. 

    Səfir Yaponiya iş adamlarına müraciət edərək, iki ölkə arasında iqtisadi əməkdaşlığın genişləndirilməsi üçün böyük potensialın olduğunu bildirmiş, Azərbaycan tərəfinin yapon şirkətlərinin istənilən təklifinə və ya layihəsinə baxmağa hazır olduğunu qeyd etmişdir. 

    Sonra Azərbaycanın turizm potensialı haqqında videoçarx nümayiş etdirilmişdir. 

    Yaponiyanın regionumuz üzrə ixtisaslaşmış turist şirkətlərinin nümayəndələri çıxış edərək Azərbaycana səfərlərin təşkilinin şərtləri, növləri və turistləri maraqlandıran digər məqamlar barədə ətraflı məlumat vermişlər. 

    Tədbirdə səfir G.İsmayılzadə tərəfindən Yaponiya iş adamlarının sualları ətraflı cavablandırılmışdır. 

    Tədbirdə Azərbaycanda istehsal edilmiş şərab nümunələri də iştirakçılara təqdim edilmişdir.

    Mənbə: http://www.tourism.az

  • Azərbaycanın turizm şirkətlərinin Dünya Turizm Təşkilatına daxil olması üçün səylər göstərilir.

    Tarix: 2013-06-15

    Azərbaycanın turizm şirkətlərinin Dünya Turizm Təşkilatına daxil olması üçün səylər göstərilir.

    Azərbaycana gələn turistlər elektron formada viza ala bilirlər. Bu proses Azərbaycanda vardır və daha yaxşı işləməsi üçün səy göstəririk. Tənzimlənmə üçün danışıqlar aparılır, treninqlər keçirilir. Biz bu işdə Xarici İşlər Nazirliyi ilə birgə çalışırıq. 

    AzərTAc xəbər verir ki, bu sözləri mədəniyyət və turizm naziri Əbülfəs Qarayev jurnalistlərə müsahibəsində demişdir. 

    Bildirmişdir ki, Azərbaycanın turizm şirkətlərinin Dünya Turizm Təşkilatına (DTT) daxil olması üçün də səylər göstərilir. Azərbaycan 2001-ci ildən DTT-nin üzvüdür. Həmin vaxtdan Azərbaycanın 3 şirkəti təşkilata assosiativ üzv qəbul olunmuşdur. Bu il Belqradda keçirilən konfransda Azərbaycanın daha 17 şirkəti üzvlük üçün müraciət etmişdir. Bu təkliflər təşkilat tərəfindən müsbət qarşılanmışdır. 

    Yay aylarında Zambiyada keçiriləcək Baş Assambleyanın iclasında onların üzvlüyünün təsdiqlənməsi gözlənilir.

    Mənbə: http://www.tourism.az

  • Azərbaycanda kitabxanalar istirahət mərkəzlərinə çevriləcək

    Tarix: 2013-06-15

    Azərbaycanda kitabxanalar istirahət mərkəzlərinə çevriləcək

    Azərbaycanda kitabxanalar tam yeni formada qurularaq vahid kitabxana-informasiya-istirahət mərkəzləri kimi fəaliyyət göstərəcək.

    Bunu Trend-ə Azərbaycanın mədəniyyət və turizm nazirinin birinci müavini Vaqif Əliyev deyib.

    Onun sözlərinə görə, ölkədəki kitabxanaların, xüsisilə kəndlərdəki kitabxanaların görkəmi və vəziyyəti o qədər də yaxşı deyil. Onların böyük əksəriyyəti bugünkü tələblərə cavab vermir.

    Nazir müavini qeyd edib ki, hazırda vahid kitabxana-informasiya-istirahət mərkəzlərinin yaradılması ilə bağlı xüsusi layihə həyata keçirilir. Bu mərkəzlər özlərində həm kitabxananın funksiyalarını çəmləşdirəcək, həm də kitabların satışını həyata keçirəcək. Eyni zamanda, burada elektron kitabxanalar yaradılacaq. Yeni mərkəzlərdə internet şəbəkəsi, WI-FI sistemləri olacaq, rabitə əlaqələri təkmilləşdiriləcək:

    "Bu mərkəzlər kənd şəraitində insanların bir istirahət yerləri olacaq. Onlar burada həm kitab oxuya bilər, həm dünyada baş verən proseslərdən xəbər tuta bilərlər. Bu mərkəzlərdə kicik yaşlı uşaqlardan tutmuş yaşlı insanlara qədər hər bir kəs öz marağını təmin edə bilər".

    V.Əliyev bildirib ki, hazırda həm aran, həm də dağ rayonları üçün bununla bağlı xüsusi layihələr hazırlanır. Layihələrin yaxın 2-3 ay ərzində hazır olacağı gözlənilir. 2014-cü ildə isə Mədəniyyət və Turizm Nazirliyi artıq öz daxili maliyyə imkanları hesabına hər rayonun bir kəndində 1 pilot mərkəz olmaqla, təxminən 10 rayonda yeni kitabxana-istirahət mərkəzi yaratmağı planlaşdırır. Bu pilot mərkəzlərin işi bəyənilərsə, 2020-ci ilədək bütün ölkə üzrə müasir tələblərə uyğun kitabxana-informasiya-istirahət mərkəzləri yaradıla bilər:

    "Bu mərkəzlər bütün ölkə üzrə yaradılacaq, hər bir rayonu, hər bir kəndi əhatə edəcək. Biz nəzərdə tuturuq ki, hər bir kənddə belə bir istirahət mərkəzləri olsun".

    Mənbə: http://az.trend.az

  • Motorlu qayıqsürmə üzrə Dünya çempionatı Bakıda keçiriləcək.

    Tarix: 2013-06-15

    Motorlu qayıqsürmə üzrə Dünya çempionatı Bakıda keçiriləcək.

    Bakı şəhəri 6-7 iyul tarixlərində ilk dəfə olaraq 2013-UIM Formula 2 motorlu qayıqsürmə üzrə Dünya çempionatının ikinci mərhələsinə ev sahibliyi edəcək.

    Dünya çempionatına 15-16 iyunda Stokholmda start veriləcək və "Su üzərində alov" şüarı altında Bakı Buxtasında həyəcanlı və valehedici sou ilə davam etdiriləcək. Yarışda 13 ölkədən 23 komanda iştirak edəcək.

    Təşkilatçılar Azərbaycanın ilk dəfə ev sahibliyi edəcəyi motorlu qayıqsürmə yarışının əhali arasında böyük marağa səbəb olacağını bildirirlər.

    Mənbə: http://az.trend.az

  • Azərbaycanın çənub bölgəsindəki turizm obyektlərinin fəaliyyəti yoxlanılır.

    Tarix: 2013-06-15

    Azərbaycanın çənub bölgəsindəki turizm obyektlərinin fəaliyyəti yoxlanılır.

    Azərbaycan Mədəniyyət və Turizm Nazirliyi yay turizm mövsümünə hazırlıq məqsədilə ölkənin çənub bölgəsindəki turizm müəssisəsələrində monitorinqlər aparır.

    Nazirlikdən Trend-ə verilən məlumata görə, Azərbaycanda yay turizm mövsümünə hazırlıq məqsədilə turizm müəssisələrində aparılan monitorinqlər iyunun 30-da yekunlaşacaq. İndiyədək aran və şimal rayonlarında monitorinqlər keçirilib.

    Sonuncu monitorinqlər isə ölkənin şimal-qərb rayonlarındakı turizm müəssisələrində aparılacaq.

    Mənbə: http://az.trend.az

  • “Azərbaycanda turizm sahəsində gəlirlər 11 faiz artıb“

    Tarix: 2013-06-13

     “Azərbaycanda turizm sahəsində gəlirlər 11 faiz artıb“

    “Sözsüz ki, Azərbaycanın turizm sektorunda təcrübəsi o qədər də yüksək deyil. Yaratdığımız konqres bürosu bizə bu sahəni də inkişaf etdirməyə kömək olacaq. Konvensiyaya qəbul edəcəyimiz otel və turizm şirkətlərinə qanunla təkliflər verəcəyik. Qanun layihəsinin əsas prinsipi həmin obyektdə çalışanların hamısı peşəkar turizmçilər olmalıdır. Digər sahələrin qeyri-peşəkarları əgər o müəssisədə çalışacaqsa, biz qanun çərçivəsində həmin otel və qurumlara lisenziya verməyəcəyik”.

    AzNews.az apa-ya istinadən xəbər verir ki, bu sözləri bu gün Bakı Biznes Mərkəzində Mədəniyyət və Turizm Nazirliyinin təşəbbüsü ilə Azərbaycan Konqres Bürosunun (Azerbaijan Convention Bureau) təqdimat mərasimində Mədəniyyət və Turizm naziri Əbülfəs Qarayev deyib. Nazir yaradılan konqresin mahiyyətindən danışıb: “Bu qurum Azərbaycanda yeni çox vacib bir qurum olacaq. Son illər Azərbaycanda beynəlxalq səviyyəli tədbirlərin çoxaldığı bir vaxta otel şəbəkəsinin və ümumiyyətlə turizm infrastrukturun inkişafı üçün əlimizdən gələni etməliyik. Bu səpkidə tədbirlərin keçirildiyi vaxtlarda dövlət səviyyəsində narahatlıq keçirirdik ki, qonaqların qarşılanması onların yerləşdirilməsi necə olacaq. Bu cür konsepsiyanın hazırlanması artıq beynəlxalq tədbirlərə ürəklə sahiblik edə biləcəyimizə bizdə əminlik yaradır. Bu konqres sahəsində bütün bu proseslər vahid bir idarə sistemi altında həyata keçiriləcək. İlk dəfə olaraq Azərbaycanda beynəlxalq səviyyədə otel şəbəkələrinin qurucuları buradadır və bu konqresin yaradılmasında bizə yaxından xidmət göstərəcəklər”. 

    Ə.Qarayev son il ərzində Azərbaycana gələn turistlərin sayında da artım olduğunu deyib: “Son üç ayın hesablamalarına görə, Azərbaycanda turizm sahəsində gəlirlər 11 faiz artıb. Bu Ümumdünya Turizm Təşkilatının hesablamasına görə 4 faizdir ki, bu da ölkəmiz üçün yüksək nəticə hesab olunur”

    Tədbirdə BMÜTT-nin Avropa regionları üzrə direktoru İzabel Qaranya, Avropa ölkələrində otel şəbəkələrinin prezidentləri çıxış edib.

    Tədbirin sonunda mədəniyyət və turizm naziri Əbülfəs Qarayevlə bir sıra brend mehmanxanaların və turizm şirkətlərinin rəhbərləri arasında büronun yaradılması barədə niyyət protokolu imzalanıb.

    Mənbə : http://aznews.az

  • Turizm sahəsində yeni qanun qəbul olunacaq

    Tarix: 2013-06-13

    Turizm sahəsində yeni qanun qəbul olunacaq

    "Azərbaycanda turizm sahəsində yeni qanun qəbul olunacaq". Trend-in məlumatına görə, bunu Azərbaycanın mədəniyyət və turizm naziri Əbülfəs Qarayev bildirib.

    BMT Ümumdünya Turizm Təşkilatı ilə əlaqələrə toxunan nazir qeyd edib ki, ÜTT Azərbaycan üçün bir sıra tövsiyələr hazırlayıb və bu tövsiyələr turizm menecmentini əhatə edir.


    Qarayev deyib ki, bu tövsiyələri və Avropa standartlarını nəzərə alaraq, turizm sahəsində yeni qanun layihəsi üzərində işləyirlər: "Biz qanun çərçivəsində hotel və digər strukturlar qarşısında xidmətlərin standartlarına dair sərt tələblər qoya biləcəyik. Bu tələblər turizm sahəsində peşəkar kadrların çalışmasına şərait yaradacaq".

    Nazir, həmçinin vurğulayıb ki, Azərbaycanın 17 turizm şirkəti Ümumdünya Turizm Təşkilatına (ÜTT) assosiativ üzvlüklə bağlı müraciət edib.
    Qarayevin sözlərinə görə, bu ilin avqust ayında Zambiyada keçiriləcək ÜTT-nin Baş Assambleyasında həmin turizm şirkətlərinin assosiativ üzvlüyü təsdiq olunmalıdır.
    Nazir qeyd edib ki, artıq quruma Azərbaycandan 3 struktur - Azərbaycan Turizm Assosiasiyası, Azərbaycan Turizm İnstitutu və Bakı Turizm İnformasiya Mərkəzi assosiativ üzv qəbul olunub.

    Mənbə : http://www.milli.az

  • Qəbələnin turizm obyektlərində yeni mövsümün başlanması münasibətilə xidmətlərə görə qiymətlər endirilmişdir

    Tarix: 2013-06-13

    Qəbələnin turizm obyektlərində yeni mövsümün başlanması münasibətilə xidmətlərə görə qiymətlər endirilmişdir

    Yay turizm mövsümünün başlanması ilə əlaqədar Qəbələ rayonundakı istirahət mərkəzlərində vətəndaşlara göstərilən xidmətlərə görə qiymətlər xeyli ucuzlaşmışdır. 

    Rayon mədəniyyət və turizm şöbəsindən AzərTAc-a bildirmişlər ki, istirahət mərkəzlərində qonaqlara müasir otel xidmətləri ilə yanaşı, Azərbaycan və Avropa yeməkləri təklif olunur. 

    Rayonun istirahət mərkəzləri otel xidmətlərinə 15-20 manatadək, restoran xidmətlərinə isə 10 faizədək endirim etmişlər. Meşələrdə və çayların sahilində yerləşən istirahət güşələrində üç otaqlı kottecin bir günlük kirayə haqqı 90-100 manatdan 70-80 manata endirilmişdir. Rayon mərkəzindəki otellərdə isə iki nəfərlik otaqları indi bir günü 30 manata sifariş etmək olar. 

    Beş ulduzlu otellər və istirahət mərkəzlərinin əksəriyyəti qonaqlara meşə gəzintisi, atla gəzinti, balıq ovu, qayıqla göldə üzmək, rayonun görməli yerlərinə və tarixi abidələrinə səyahətlər təşkil edir. Qəbələdə turistlərin ən çox üz tutduğu yerlərdən biri olan “Qəbələnd” istirahət və əyləncə mərkəzində də qiymətlərə endirimlər edilmişdir. 

    Xatırladaq ki, 2012-ci ildə Qəbələ rayonuna gələn yerli və xarici turistlərin sayı 45 min 500 nəfər olmuşdur, bu da əvvəlki illə müqayisədə 9650 nəfər çoxdur. Turistlərdən 31 min 350-si yerli, 14 min 150 nəfəri isə xarici ölkə vətəndaşlarıdır. Qonaqların 38 min 500-ü müxtəlif turizm obyektlərində istirahət edib, 5400-ü işgüzar səfərdə olmuş, 1600 nəfəri isə sanatoriyada müalicə almışlar. 

    Ümumiyyətlə isə Qəbələ rayonuna gələn turistlərin sayı son 4 ildə üç dəfə artmışdır.

    Mənbə: http://www.tourism.az

  • Azərbaycan Konqres Bürosunun təqdimatı olmuşdur.

    Tarix: 2013-06-13

    Azərbaycan Konqres Bürosunun təqdimatı olmuşdur.

    İyunun 10-da Bakı Biznes Mərkəzində Mədəniyyət və Turizm Nazirliyinin təşəbbüsü ilə Azərbaycan Konqres Bürosunun (Azerbaijan Convention Bureau) təqdimatı keçirilmişdir. 

    AzərTAc xəbər verir ki, mədəniyyət və turizm naziri Əbülfəs Qarayev Azərbaycan Konqres Bürosunun yaradılması istiqamətində bir il müddətində müzakirələrin aparıldığını demişdir. Diqqətə çatdırmışdır ki, Azərbaycan mütəmadi olaraq möhtəşəm beynəlxalq tədbirlərə ev sahibliyi edir, ölkəyə gələn xarici qonaqların sayı getdikcə artır. Bu isə həm dövlətin, həm də turizm sənayesinin üzərinə böyük məsuliyyət qoyur. Hər qonağa yüksək xidmət göstərilməlidir və bu istiqamətdə görülən işlər ildən-ilə təkmilləşdirilir. Dünya təcrübəsi göstərir ki, beynəlxalq aləmdə bu tədbirlərin keçirilməsində maraqlı olan qurumlar peşəkar olaraq bir assosiasiya şəklində fəaliyyət göstərirlər. Bu assosiasiya MİCE (işgüzar) adlanır. 

    Nazir demişdir ki, Azərbaycanda turizm sənayesi və infrastrukturu yüksək səviyyədədir. Ölkəmizdə işgüzar turizmin inkişaf etdirilməsi məqsədi ilə yaradılan büronun əsas fəaliyyət istiqamətləri respublikamıza irimiqyaslı beynəlxalq tədbirlərin cəlb edilməsi, Azərbaycanın MİCE (işgüzar) turizm istiqaməti kimi təşviqi, beynəlxalq tədbirlərlə əlaqədar tender müsabiqələrində iştirak və s. məsələləri əhatə edəcəkdir. Azərbaycan Konqres Bürosu dövlətin və özəl sektorun vahid siyasət yürütməsinə imkan verəcəkdir. 

    Dünya Turizm Təşkilatının Avropa üzrə direktoru İzabel Qaraniya Azərbaycanda turizm sahəsinə hökumət səviyyəsində xüsusi diqqət yetirildiyini, bu istiqamətdə müxtəlif beynəlxalq tədbirlərin keçirildiyini təqdirəlayiq hesab etmişdir. Dünyada turizmin inkişafı, bu sahədən əldə olunan gəlirlər barədə faktları diqqətə çatdıran İzabel Qaraniya Azərbaycan Konqres Bürosunun müvafiq sahənin inkişafına müsbət təsir edəcəyini bildirmiş, yeni quruma fəaliyyətində uğurlar arzulamışdır. 

    Ölkəmizdə fəaliyyət göstərən brend mehmanxanaların adından çıxış edən “Fairmont Baku” otelinin baş meneceri Adrian Ellis Azərbaycan Konqres Bürosunun fəaliyyətinin ölkəmizin turizm sənayesinin təbliğində əhəmiyyətli rol oynayacağını demişdir. 

    Sonra “European Development & Solutions” (EUDS) şirkətindən Florian Senqşmit və İnqa Tremmel Azərbaycan Konqres Bürosu ilə bağlı təqdimat etmişlər. 

    Mərasim zamanı mədəniyyət və turizm naziri Əbülfəs Qarayev ilə bir sıra brend mehmanxanaların və turizm şirkətlərinin rəhbərləri arasında Büronun yaradılması barədə niyyət protokolu imzalanmışdır. 

    Mənbə: http://www.tourism.az

     

  • Bakıda “MDB ölkələri və Gürcüstan üçün turizm statistikası sahəsində bilik səviyyəsinin artırılması Proqramı” çərçivəsində üçüncü statistika seminarı işə başlamışdır.

    Tarix: 2013-06-13

     Bakıda “MDB ölkələri və Gürcüstan üçün turizm statistikası sahəsində bilik səviyyəsinin artırılması Proqramı” çərçivəsində üçüncü statistika seminarı işə başlamışdır.

    İyunun 10-da BMT-nin Dünya Turizm Təşkilatının dəstəyi və Azərbaycan Respublikasının Mədəniyyət və Turizm Nazirliyinin təşkilatçılığı ilə Bakıda “MDB ölkələri və Gürcüstan üçün turizm statistikası sahəsində bilik səviyyəsinin artırılması Proqramı” çərçivəsində üçüncü (sonuncu) statistika seminarı öz işinə başlamışdır. 

    AzərTAc xəbər verir ki, 2011-ci il martın 23-də imzalanmış müvafiq sazişə əsasən, 2011-ci və 2012-ci illərdə aidiyyəti üzrə birinci və ikinci seminarlar Bakıda keçirilmişdir. 

    Seminarın açılış sessiyasında Dünya Turizm Təşkilatının baş katibi Taleb Rifainin seminar iştirakçılarına ünvanlanmış videoçarxı nümayiş etdirilmişdir. Baş katib Azərbaycanın öhdəsinə götürdüyü proqramın və bugünkü yekun seminarın ölkələrin milli turizm statistikasının öyrənilməsi baxımından vacib olduğunu bildirmişdir. 

    Taleb Rifai turizmin inkişafına stimul vermək baxımından bu seminarın çox önəmli olduğunu vurğulamış və iştirakçılara uğurlar arzulamışdır. 

    Mədəniyyət və turizm nazirinin müavini Nazim Səmədov seminar iştirakçılarını salamlayaraq Azərbaycanda turizmin inkişafına göstərdikləri marağa görə onlara nazirlik adından minnətdarlığını bildirmişdir. O, statistika sahəsinin, dolğun və səlis statistikaların toplanmasının digər sahələr kimi, turizm sahəsi üçün də çox əhəmiyyətli olduğunu vurğulamışdır. Dəqiq statistikanın bir sıra problemlərin həlli üçün vacib bir sahə olduğunu demişdir. 

    Qeyd edilmişdir ki, planlaşdırmaq, konsepsiyaların və inkişaf proqramlarının hazırlanması və tətbiqi, turizm sahəsində əldə olunmuş nailiyyətlərin ölçülməsi, sahələr üzrə maliyyələşdirilmə strategiyasının qurulması və digər işlərin səmərəli təşkili tam şəkildə statistik məlumatların toplanması, təhlili və istifadəsindən asılıdır. 

    Nəzərə çatdırılmışdır ki, digər sahələrin statistik göstəricilərini əsas tutaraq turizm sahəsində fəaliyyəti planlaşdırmaq üçün turizm statistikası mühüm əhəmiyyət kəsb edir. Məsələn, infrastrukturun inkişafı, yol inşaatı və təmiri, nəqliyyat və s. iqtisadi göstəricilər bilavasitə turizmin inkişaf planlarına təsir göstərir. Bu səbəbdən təkcə turizm üzrə deyil, digər sahələrdə də statistik məlumatların toplanması vacibdir. 

    Qeyd edilmişdir ki, belə seminarlar beynəlxalq təcrübəni öyrənmək üçün bir vasitədir. 

    Vurğulanmışdır ki, respublikamızda statistika üzrə beynəlxalq təcrübəli mütəxəssislərin sayının artması bu sahədə yeni ideyaların və yanaşmaların yaranmasına səbəb olacaqdır. 

    Statistika seminarına marağın tədricən artdığı, 2011-ci ilin seminarında 19, 2012-ci ildə 22, builki seminarda isə iştirakçıların sayının 23 nəfərə çatdığı bildirilmişdir. 

    Seminarda Azərbaycan, Gürcüstan, Qazaxıstan, Moldova, Rusiya, Özbəkistan və Belarusun təmsil olunduğu diqqətə çatdırılmışdır. 

    Qeyd olunmuşdur ki, digər sahələr və layihələr üzrə Dünya Turizm Təşkilatı və sözügedən ölkələrlə əməkdaşlıq genişləndirilməli və seminarlara yeni ölkələr cəlb olunmalıdır. 

    Azərbaycan və Dünya Turizm Təşkilatının bir neçə layihə çərçivəsində birgə çalışdıqları vurğulanaraq ölkəmizin hər bir tərəf ilə əməkdaşlıq prinsiplərinə sadiq qaldığı və ikitərəfli münasibətlər çərçivəsində burada iştirak edən hər bir ölkə ilə əməkdaşlığa hazır olduğu vurğulanmışdır. 

    Nəzərə çatdırılmışdır ki, ümumiyyətlə, turizm sahəsində postsovet məkanının müstəqil dövlətləri ilə əlaqələrin bərpası və genişləndirilməsi Azərbaycan üçün prioritet istiqamətdir. Çünki digər ölkələrdən fərqli olaraq bu ölkələr arasında viza, hava nəqliyyatı və dil problemi yoxdur. Eyni zamanda, mədəni, humanitar və s. sahələrdə əlaqələr davamlı inkişaf edir. 

    Bu gün başlanan seminarın qarşıya qoyulan sualların cavabını özündə əks etdirəcəyi söylənilmişdir. 
    Dünya Turizm Təşkilatının Avropa üzrə direktoru xanım İzabel Qaranya Azərbaycanın turizm sahəsinə mühüm əhəmiyyət verdiyini və artıq ölkəmizin turizm məkanına çevrildiyini bildirmişdir. 

    Direktor Azərbaycanda bir çox layihələr həyata keçirdiklərini diqqətə çatdırmış, bunlara misal olaraq Şahdağ Qış-Yay Turizm Kompleksini göstərmişdir. Qeyd etmişdir ki, turizmin səviyyəsinin ölçülməsi bu sahəyə nəzarət və digər iqtisadi sektor ilə müqayisə etməyə imkan verir. 

    Seminarın təşkilinə görə Azərbaycan tərəfinə təşəkkürünü bildirən İzabel Qaranya bu seminarın ölkələrdə turizm statistikasının göstəricilərinin yaxşılaşdırılması baxımından faydalı olacağını qeyd etmişdir. 

    Seminarda Azərbaycan tərəfdən Mədəniyyət və Turizm Nazirliyi, Dövlət Statistika Komitəsi, Mərkəzi Bank və Dövlət Miqrasiya Xidmətinin, həmçinin təmsil olunan ölkələrin aidiyyəti qurumlarının nümayəndələri və ekspertlər iştirak edirlər. 

    İyunun 12-dək seminar öz işini sessiyalarla davam etdirəcəkdir.

    Mənbə: http://www.tourism.az